3 მაისს თბილისის ოლიმპიურ სასახლეში ფუტსალის ლიგა 2-ის რეგულარული სეზონი დასრულდა. გუნდების მომდევნო ეტაპი პლეიოფია, სადაც 6 გუნდი საქართველოს ფუტსალის ლიგა-2ის თასისთვის გაიბრძოლებს.

¼ ფინალური ეტაპი 8 მაისს, „ქუთაისი“ VS „რუსთავის“ შეხვედრით გაიხსნება, იქამდე კი მოგახსენებთ გუნდების სტატისტიკას და რეგულარული სეზონის შედეგებს.

სატურნირო ცხრილში პირველი ადგილი „თსუ“-მ დაიკავა და რეგულარული სეზონის ჩემპიონის სტატუსიც მოიპოვა. „თესეუელებმა“ პირველ ადგილზე გასვლით, პირდაპირ ნახევარფინალური საგზურის მოპოვება შეძლეს. მათთან ერთად ნახევარფინალში თავის მეტოქეს ელოდება „UG 2”-იც.

რაც შეეხებათ დარჩენილ 4 გუნდს, „ქუთაისი“ „რუსთავს“ გაეჯიბრება, ხოლო „ბსსა“ „FLC03-2”-ს.

„თესეუელებმა“ რეგულარულ სეზონში 52 ქულა დააგროვეს, გაიტანეს 117 (ყველაზე მეტი) და გაუშვეს 50 (ყველაზე ცოტა) გოლი.

ჩატარებული 20 შეხვედრიდან 17-ის მოგება მოახერხეს, 1 ფრედ დაასრულეს, 2 თამაში კი დათმეს.

როგორც გუნდის, ისე ლიგის ბომბარდირი რომან კუხიანიძეა. „თსუ“-ს მეთერთმეტე ნომერს მიმდინარე სეზონში 29 გოლი აქვს გატანილი. ამასთან ერთად კუხიანიძე საგოლე გადაცემებშიც ლიდერობს (13). გუნდის მეორე საუკეთესო მეპასე გიორგი კურტანიძეა - 12 საგოლე გადაცემა.

„UG 2”-მა მეორე ადგილის დაკავება 38 ქულით მოახერხა. „უნივერსიტეტელებმა“ 12 თამაში მოიგეს, 2 ფრედ დაასრულეს, 6 შემთხვევაში კი დამარცხდნენ.

გატანილი - 86 გოლი.

გაშვებული - 56 გოლი (მეორე საუკეთესო შედეგი).

გატანილ გოლების კუთხით გამოირჩევა ლევან იახტნიშვილი, რომელსაც 13 ჩატარებულ შეხვედრაში 22 გოლი აქვს გატანილი.

გაკეთებულ საგოლე პასებში ივიკო ჭარაქაშვილი ლიდერობს, ჭარაქაშვილის ანგარიშზე 7 მატჩში 7 ასისტია.

მესამე პოზიციაზე გასულმა „ბათუმის სახელმწიფო საზღვაო აკადემიამ" 36 ქულა დააგროვა.

„ბათუმელებმა“ 11 მატჩში იმარჯვეს, 3 ფრედ დაასრულეს, 6-ჯერ კი დამარცხდნენ.

ლიგის მეორე საუკეთესო გამტანი „აკადემიელთა“ 3 ნომერი, სპარტაკ ლომიძეა. ლომიძემ 15 თამაშში 23-ჯერ შეძლო მეტოქე გუნდების კარის აღება.

ბექა ლორიას და მალახაზ შამილაძეს კი თანაბარი რაოდენობის, 10-10 ასისტი აქვთ გაკეთებული.

„შავიზღვისპირელებმა“ 97 გოლი გაიტანეს (მეორე საუკეთესო შედეგი), 84 კი გაუშვეს.

მათი მეტოქე ¼ ფინალში „FLC 03-2” იქნება. გუნდები მიმდინარე სეზონში 4-ჯერ შეხვდნენ ერთმანეთს, 3 თამაშის მოგება „ბსსა“-მ შეძლო, 1 კი საყაიმო ანგარიშით დასრულდა (3:3).

„ქუთაისმა“ ასპარეზობა მე-4 ადგილზე დაასრულა და 25 ქულის დაგროვება მოახერხა.

„ქუთათურებმა“ რეგულარულ სეზონში 7 თამაში მოიგეს, 9 დათმეს, 4 შემთხვევაში კი მატჩი ფრედ დაასრულეს.

გატანილი - 60 გოლი.

გაშვებული - 82 გოლი.

ბაკურ გულუა ლიდერობს გუნდს გატანილი გოლების ასპექტში, კაპიტნის ანგარიშზე 17 გოლი და 6 საგოლე გადაცემაა.

„ქუთაისის“ მეტოქე ¼ ფინალში „რუსთავი“ იქნება. რეგულარულ სეზონში გუნდების გზა 4-ჯერ გადაიკვეთა, საიდანაც 2 შემთხვევაში გამარჯვება „იმერლებს“ დარჩათ (4:1, 4:1), ორი შეხვედრა კი ფრედ დასრულდა (3:3, 2:2).

რაც შეეხება „რუსთავს“, გუნდი მე-5 ადგილზე გავიდა ცხრილში და 16 ქულის აღება შეძლო. 4 თამაშის მოგება მოახერხეს, 4 ფრედ დაასრულეს, 12 კი წააგეს.

„რუსთაველებმა“ ჩატარებულ 20 თამაშში 60 გოლი გაიტანეს, 90 კი საკუთარ კარებში მიიღეს.

გუნდის საუკეთესო გამტანი ალექსანდრე გოგოლაძეა, რომელიც 20 გოლით ბომბარდირთა დავაში მე-4 ადგილს იკავებს. გოგოლაძე ასევე გამოირჩევა საგოლე გადაცემებშიც - 8.

და ბოლოს „FLC 03-2” –  „ფალკონებმა“ ცხრილში ბოლო პოზიცია დაიკავეს. წააგეს 17 მატჩი, 2 ფრედ დაასრულეს და მხოლოდ ერთხელ მოახერხეს გამარჯვების მოგროვება. დაგროვებული ქულათა რაოდენობა - 5.

გაიტანეს ყველაზე ცოტა 39 გოლი და გაუშვეს ყველაზე მეტი 103 ბურთი.

4-4 გოლი აქვთ გატანილი დავით უბილავას, ლუკა კანკავას, თორნიკე ზოიძეს და ლევან კოშაძეს.

1/4 ფინალი - „ქუთაისი“ VS „რუსთავი“.

1/4 ფინალი - „ბსსა“ VS „FLC 03-2”.

ორივე შეხვედრას თბილისის ოლიმპიური სასახლე უმასპინძლებს და პირდაპირი ტრანსლაციის ხილვას SBM.GE-ზე შეძლებთ.

„თსუ“ ნახევარფინალში „ქუთაისსა“ და „რუსთავს“ შორის გამარჯვებულს დაელოდება.

„UG 2” კი „ბსსა“-ს და „FLC 03-2”-ს შორის უკეთესს შეხვდება.