ლიგა 2-ში 1/2 ფინალური ეტაპი "FLC03"-ის გამარჯვებით დაიწყო!
ყველა სიახლე
ფუტსალის ლიგა 2-ის ნახევარფინალურმა ეტაპმა სტარტი 29 მარტს, თბილისის ოლიმპიურ სასახლეში აიღო.
პირველ შეხვედრაში ერთმანეთს „FLC 03” და „სეუ“ დაუპირისპირდნენ. მოთამაშეებმა საკმაოდ დაძაბული და საინტერესო ორი 20-წუთიანი ტაიმი შემოგვთავაზეს. ანგარიში ბექა მირიანაშვილმა მე-11 წუთზე, დამუშავებული სტანდარტის შემდგომ, ძლიერი დარტყმით გახსნა. „სეუ“-ს დიდი დრო არ დასჭირვებია წონასწორობის აღსადგენად, მე-15 წუთზე ანდრია ძიძიგური ახერხებს ანგარიშის გათანაბრებას და შესვენებაზეც სწორედ ამ ანგარიშით გავიდნენ გუნდები!
მეორე ნახევრის სტარტი უკეთესი „სეუ“-ს გამოუვიდა და 25-ე წუთზე ლუკა ალანიას გოლით უკვე დაწინაურდნენ შეხვედრაში. 4 წუთის შემდეგ „ფალკონებმა“ გაათანაბრეს! მატჩის ტემპმა კიდევ უფრო იმატა, შესაბამისად დაძაბულობის პროცენტულობაც ამაღლდა. ორმხრივი შეტევების ფონზე, მეკარისგან დაწყებული გამოზომილი გადაცემებით აწყობილი შეტევა ნიკა ხაჭაპურიძის დამაგვირგვინებელი ასისტის შემდეგ გიორგი ხმალაძემ გოლით დაასრულა და საკუთარი გუნდის კიდევ ერთხელ დაწინაურება შეძლო (3-2).
შეხვედრაში ანგარიში აღარ შეცვლილა და „FLC 03” სერიაში დაწინაურდა 1-0!
5 გატანილი ბურთის გარდა მატჩში ასევე 5 ყვითელი ბარათიც ვიხილეთ. საუკეთესოებად კი ბექა მირიანაშვილი და ნიკა სიდამონიძე დასახელდნენ!
გუნდების მეორე დაპირისპირება 5 აპრილს, თბილისის ოლიმპიურ სასახლეში გაიმართება. შეხვედრა 14:30-ზე დაიწყება, პირდაპირი ტრანსლაციის ნახვას კი SBM.GE-ზე შეძლებთ: FLC03 vs SEU