გრანდ ლიგაში McGill-მა "არმია"-ს პირველობა წაართვა!

ყველა სიახლე
11 მარტი 2025

გრანდ ლიგაში McGill-მა

9 მარტს თბილისის ოლიმპიურ სასახლეში ბიზნესის ჩემპიონთა ლიგის გრანდ ლიგისა და საკვალიფიკაციო ლიგის მეხუთე ტურის შეხვედრები გაიმართა.

გრანდ ლიგა „DHL“-ისა და „არმიას“ დაძაბული დაპირისპირებით დაიწყო. მესამე წუთზე უპირატესობა „ძალოვნებმა“ მოიპოვეს. მერვე წუთზე წონასწორობა აღდგა. „არმიამ“ პირველ ტაიმში ლიდერობა დაიბრუნა და 2-1 იმარჯვა, მაგრამ მეორე ნახევარი „DHL“-ის სასარგებლოდ დაიწყო. ფაქტობრივად, ბოლო წუთამდე ანგარიში სწორედ მათ მიჰყავდათ 3-2. საფინალო სირენამდე მამუკა ამაშუკელმა აქტივში მეორე გოლიც მიითვალა და გუნდები საბოლოოდ ფრეზე (3-3) გაიყარნენ.  DHL-ის მხრიდან დუბლი გოჩა გიორგანაშვილმა შეასრულა.

გრანდ ლიგის მომდევნო მატჩში SIS-მა „ინვესტორსაინი“ მარტივად 6-3 დაამარცხა. შეხვედრა მეცამეტე წუთამდე დაძაბული იყო და ტაბლოზე ანგარიში 2-2 გახლდათ, თუმცა „სპეციალური საგამოძიებო სამსახური“ შეტევაში უფრო გააქტიურდა და მეტოქეს ოთხი ბურთი ზედიზედ გაუტანა, რამაც დიდი უპირატესობა შექმნა. გამარჯვებულთა რიგებიდან ორ-ორი გოლია თეიმურაზ ჯაფარიძისა და ამირან ცხომარიას სახელზე.

ოთხბურთიანი სხვაობით სძლია „ავერსმა“ „ბანკი ქართუს“. მიუხედავად იმისა, რომ „ფარმაცევტებს“ მეათე წუთისთვის სამბურთიანი გაქცევა ჰქონდათ, ტაიმის მიწურულს „ქართუს“ გოლმა თამაშში დაძაბულობა მაინც შემოიტანა. მეორე ნახევრის ბოლოსკენ გიორგი კიკვილაშვილმა დუბლი შეასრულა და „ავერსი“ ყოველგვარი წნეხისგან გაათავისუფლა - საბოლოო ანგარიში 5-1.

3-1 მოუგო „McGill“-მა „ბაქსვუდს“. ნიკა ნანობაშვილის დუბლს და ვახტანგ სირაძის გოლს „ბაქსვუდმა“ მხოლოდ ოცდამესამე წუთზე უპასუხა, რაც თამაშის გადასარჩენად საკმარისი ბუნებრივია არ აღმოჩნდა. 

მატჩის დაწყებამდე „ბაქსვუდელთა“ 27-ე ნომერს, ალექსანდრე შენგელიას ბიზნესის ჩემპიონთა ლიგის პარტნიორი ბრენდისგან „Manuel Caffe Georgia”-სგან უმაღლესი ხარისხის იტალიური პროდუქცია გადაეცა, როგორც გრანდ ლიგის მეოთხე ტურის საუკეთესო მოთამაშეს.

მეხუთე ტურში გამართული მატჩების შედეგად, "არმიამ" ქულები დაკარგა, რითაც "McGill"-მა ისარგებლა და ცხრილში პირველობა მოიპოვა.

რაც შეეხება საკვალიფიკაციო ლიგას, თბილისის ოლიმპიურ სასახლეში მეხუთე ტურის ერთი შეხვედრა ვიხილეთ. „E-Team”-მა „PERI“ სრულიად უშანსოდ დატოვა და სოლიდური ანგარიშით 10-0 დაამარცხა. შეხვედრაში დუბლი გიგი პატარაიამ, ზუკა ფარცვანიამ, ლაშა იაკობაძემ და გიორგი ბერიშვილმა შესარულეს.

ბიზნესის ჩემპიონთა ლიგის მორიგი სათამაშო დღე 16 მარტს შედგება. ერთმანეთს ბრინჯაოს, ვერცხლის, ოქროსა და სუპერლიგის გუნდები დაუპირისპირდებიან.



  © SBM, 2016-2025

loading