ფუტსალის ლიგა 2-ის 2024/25 წწ. სეზონის მესამე ტური თბილისსა და ბათუმში გაიმართა.

თბილისის ოლიმპიურ სასახლეში ტური „თსუ 2“-ისა და „გორის“ დაპირისპირებით დაიწყო. დაძაბულ შეხვედრაში „სტუმრებმა“ წონასწორობა ორჯერ აღადგინეს. ოცდამეთოთხმეტე წუთზე „სტუდენტებმა“ ანგარიში 3-2 გახადეს და არასრულ ერთ წუთში კიდევ ორი გოლის გატანა შეძლეს. მიუხედავად უპირატესობისა, თამაშის ბოლო წუთები დრამატული გამოდგა. ილია ლუკაშვილმა და ლუკა ბერიანიძემ სხვაობა მინიმუმამდე შეამცირეს. მატჩი საბოლოოდ 5-4 დასრულდა.

თამაშის სტარტზე ბრძოლის მიუხედავად, დიდი უპირატესობის მოპოვება შეძლო „ტფილისმა“ „ქუთაისთან“ და მეტოქე 7-3 დაამარცხა. პირველივე წუთზე ანგარიში ავტოგოლით გაიხსნა და „ქუთათურები“ დაწინაურდნენ. გეგა კოშაძემ მიღებული ბურთი მალევე გაქვითა, ლაშა ჯიქიას გოლით კი „ტფილისი“ წინ გავიდა. მერვე წუთზე „ქუთაისმა“ ანგარიში გაათანაბრა, მაგრამ „თბილისელებმა“ უპირატესობა მალევე დაიბრუნეს და აღარ დაუთმიათ. შეხვედრაში დუბლი ლაშა ჯიქიამ გაიფორმა.

სანახაობრივი იყო „სეუ“-სა და „FLC03”-ს შორის გამართული მატჩი. პირველი ტაიმი სახიფათო მომენტების მიუხედავად, გოლის გარეშე დასრულდა. ოცდამეექვსე წუთზე „არწივები“ გიორგი ტაბახმელაშვილის გოლით წინ გავიდნენ. ანგარიში ნიკა ბიძინაშვილმა გაათანაბრა და მისივე საგოლე გადაცემით ლუკა ალანიამ გამარჯვების გოლი გაიტანა. „ფალკონს“ მეორე გოლის მიღებამდე ათმეტრიანი საჯარიმო დარტყმით დაწინაურება შეეძლო, მაგრამ გუნდმა შანსი ვერ გამოიყენა და 2-1 დამარცხდა.

ტურის დასკვნითი მატჩი ბათუმის სპორტის სასახლეში გაიმართა. „ბსსა“-მ „ილიაუნი“-ს უმასპინძლა. „ილიაუნი“ გიგა ხინთიბაძის გოლით მეთექვსმეტე წუთამდე იგებდა, მაგრამ ტაიმის დასრულებამდე „აჭარლებმა“ თამაში შემოატრიალეს და ანგარიში 2-1 გახადეს. მეორე ნახევარში მალხაზ შამილაძემ (ბსსა) აქტივში მეორე ბურთიც მიითვალა. განსაკურებით დაძაბული იყო შეხვედრის უკანასკნელი სამი წუთი. „სტუმრებმა“ მეტოქეს ორი გოლი გაუტანეს, მაგრამ „ბსსა“-მ მიღებულ ბურთს უპასუხა და საკუთარ კედლებში 4-3 იმარჯვა.

მესამე ტურის შემდეგ ფუტსალის ლიგა 3-ის სატურნირო ცხრილში სამ-სამი მოგებით „ტფილისი“ და „სეუ“ ლიდერობენ.

მეოთხე ტურის შეხვედრები 1 და 2 ნოემბერს თბილისში, 5 ნოემბერს კი გორში გაიმართება.