ფუტსალის ლიგა 3-ის 2023/24 წწ. სეზონის ბრინჯაოს პრიზიორი "ბათუმის სახელმწიფო საზღვაო აკადემია" გახდა. 

დაძაბულ საპასუხო მატჩში "ბსსა"-მ "ბათუმის სპორტული ცენტრი" ბოლო წუთზე გატანილი გამარჯვების გოლით 5-4 დაამარცხა და ჩემპიონატში მესამე ადგილი დაიკავა. 

ბათუმის სპორტის სასახლეში გამართული დაპირისპირება სანახობრივი გამოდგა. "ბსც"-მ სერიაში წონასწორობის აღსადგენად გაიბრძოლა, თუმცა გუნდს ძალები ბოლომდე არ ეყო. საწყის სამ წუთში რაულ ჩიკიროვის დუბლს მისმა ძმამ, მოსე ჩიკიროვმა, უპასუხა და სხვაობა მინიმუმამდე დაიყვანა (2-1). ტაიმის დასრულებამდე რაულ ჩიკიროვმა ანგარიში 3-1 გახადა, აქტივში მეოთხე გოლი კი ოცდამეათე წუთზე მიითვალა. 

"ბსც"-მ მეორე ტაიმში ანგარიშის გათანაბრება შეძლო (4-4), მაგრამ თამაშის დასრულებამდე 14 წამით ადრე რეზო მალაყმაძის გოლით მესამე ადგილი "ბსსა"-მ დაიკავა.

სერიაში გატანილი 8 გოლით რაულ ჩიკიროვმა ბომბარდირთა დავაში უშუალო კონკურენტ გიორგი თოდუას ორი გოლით გადაუსწრო. თოდუა "ტიფლისთან" ერთად საჩემპიონო ბრძოლას აგრძელებს და სეზონის საუკეთესო ბომბარდირიც ჩემპიონთან ერთად გამოვლინდება.

"ჯიპა"-სა და "ტიფლისს" შორის განმეორებითი ფინალური დაპირისპირება 11 მაისს თბილისში, სპორტ კომპლექს არენა 2-ში გაიმართება.