თსუ-მ პირველი ნახევარფინალი დამატებით დროში მოიგო!

თბილისის სპორტის სასახლეში ფუტსალის ლიგის 2018/19 წ.წ. სეზონის პირველი ნახევარფინალური შეხვედრების სერია TMC თბილისისა და თსუ-ს დაპირისპირებით დაიწყო. ცენტრალური მატჩის ძირითადი დრო ფრედ 1:1 დასრულდა. დამატებითი დროის სათავისოდ გამოყენება „უნივერსიტეტელება“ შეძლეს და დაძაბულ ბრძოლაში გამარჯვებაც მოიპოვეს - 2:1.  მეთერთმეტე წუთზე „მედიკოსების“ დაწინაურება გიორგი სილაგავამ მოახერხა, თუმცა წონასწორობა გიორგი ჩიმაკაძემ აღადგინა. შეხვედრას წერტილი მეორე დამატებით ნახევარში თსუ-ს მოთამაშე-მწვრთნელმა დავით ბობოხიძემ დაუსვა.

მეორე ნახევარფინალურ მატჩს გუნდები 3 მაისს თბილისის ოლიმპიურ სასახლეში გამართავენ.

Sbm.ge გთავაზობთ მატჩის შემდგომ კომენტარებს:

ალექსანდრე ძაბირაძე, TMC თბილისის მთავარი მწვრთნელი: „პირველ რიგში, მოწინაღმდეგე გუნდს გამარჯვებას ვულოცავ. რამდენიმე ფეხბურთელი გვაკლდა, რამაც გვაიძულა თავიდანვე ხუთი-ოთხზე შეტევა გამოგვეყენებინა. ჩვენი მიზანი იყო მეტი პასი და შეტევა განგვეხორციელებინა. არ გაამრთლა მცდელობამ და პირველ შეხვედრაში დავმარცხდით, მაგრამ ყველაფერი წინაა. თამაშები სამ მოგებამდე გრძელდება. შემდეგ მატჩამდე ძალების აღდგენას შევეცდებით.“

დავით ბობოხიძე, თსუ-ს მთავარი მწვრთნელი: „ჩვენი დღევანდელი მოწინააღმდეგე მოქმედი ჩემპიონია, შესაბამისად, დაძაბულ თამაშს ველოდით. სასიხარულოა, რომ პირველი მატჩი ჩვენს სასარგებლოდ დავასრულეთ. ბიჭები ბოლომდე დაიხარჯნენ, მაგრამ არ უნდა მოვდუნდეთ. რამდენიმე ფეხბურთელს ტრავმა აქვს - შემდეგი მატჩისთვის შევეცდებით სრულ მზადყოფნაში ვიყოთ. ორი მნიშვნელოვანი მოთამაშე აკლდა მეტოქეს და ვფიქრობ, შემდეგი ნახევარფინალები სულ სხვა სცენარით წარიმართება. მინდა ასევე აღვნიშნო გულშემატკივრების თანადგომა და მათ მადლობა გდავუხადო.“

პირველი ნახევარფინალური სერიის მეორე მატჩში ერთმანეთს თელასი და ქუთასის მართვე უპირისპრდებიან.