ფუტსალის ლიგა: პირველი წრის დასრულებამდე, ერთი ტურით ადრე...

16 თებერვალს,  თბილისის ოლიმპიური სასახლე, საქართველოს ფუტსალის ლიგის  2016/17 წ.წ გათამაშების, VIII ტურის შეხვედრებს უმასპინძლებს. გამონაკლისის სახით, პარასკევი დღის ნაცვლად, თამაშები ხუთშაბათს გაიმართება.

საპლეიოფო ზონაში მოსახვედრად შექმნილი სატურნირო დაძაბულობის გამო, ყველა ქულას ოქროს ფასი აქვს და ამ მხრივ, არც პირველი წრის ბოლოს წინა ტური იქნება გამონაკლისი. თუმცა შესაძლოა ეს არ ვრცელდებოდეს ტურის პირველ შეხვედრაზე, რომელშიც ერთმანეთს აფხაზეთი და თბილისი ვარიორსი დაუპირისპირდებიან. წელს საუცხოო ფორმაში მყოფი „ზღვისპირელები“, ამ მატჩში უდაო ფავორიტის სტატუსით წარსდგებიან და დაგეგმილი სამი ქულის მოპოვებას შეეცდებიან. მატჩი 12:00 სთ-ზე დაიწყება.

დიდი ალბათობით, ზედიზედ მეორე შეხვედრაში არ დაკარგავს ქულებს გათამაშების ერთპიროვნული ლიდერი მფკ ტატიშვილი, რომლის მეტოქეც ჩემპიონატის ყველაზე არასტაბილური და არაპროგნოზირებადი გუნდი, მფკ თბილისი იქნება. მატჩი 14:00 სთ-ზე აიღებს სტარტს.

16:00 სთ-ზე გამართავს თავის შეხვედრას, ჩემპიონატის კიდევ ერთი ფავორიტი, სტუ-თელასი. მიუხედავად სატრანსფერო ფანჯრის დროს განცდილი დიდი დანაკარგებისა (დავით ბობოხიძე მფკ ტატიშვილში გადავიდა, ხოლო არჩილ სებისკვერაძემ კარიერა ბელორუსულ „ლიდსელმაში“ განაგრძო), წინა ტურში ტატიშვილთან დაპირისპირებისას „ენერგეტიკოსებმა“ დაამტკიცეს, რომ ისინი ბოლომდე იბრძოლებენ ჩემპიონის ტიტულის მოსაპოვებლად. თელასი, 2017 წლის აღმოჩენას და მთავარი სენსაციის ავტორს, მფკ იბსუ-ს (აგორასთან 5-5) დაუპირისპირდება. გაიმართება ეროვნული ნაკრების ამჟამინდელი და ყოფილი მთავარი მწვრთნელების დუელი - ავთანდილ ასათიანი, ალიკ სარქისიანის წინააღმდეგ.

ტური ბათუმური დერბით გაგრძელდება. 18:00 სთ-ზე ბათუმის სახელმწიფო უნივერსიტეტის კლუბი, დინამო ბათუმს დაუპირისპირდება. გარდა პრინციპული მეტოქეობისა, ამ შეხვედრას ორივე გუნდისთვის სატურნირო თვალსაზრისით უდიდესი მნიშვნელობა აქვს. „სტუდენტებისთვის“ ეს ერთ-ერთი ბოლო შანსია, რომ პლეი ოფისთვის ბრძოლას საბოლოოდ არ გამოეთიშონ, ხოლო ოთხეულში დამკვიდრებული დინამოელები, საკუთარი პოზიციების შენარჩუნებას შეეცდებიან.

ხუთშაბათის სათამაშო დღეს, ტურის ცენტრალური შეხვედრა დაასრულებს. ბოლო მატჩებში წარუმატებლად მოასპარეზე აგორა, რადიკალურად განსხვავებულ სიტუაციაში მყოფ მფკ მგლებს დაუპირისპირდება. ისევე როგორც „ბათუმურ დერბიში“, სასწორზე აქაც საპლეიოფო მნიშვნელობის ქულები დევს. ტურის დასკვნითი შეხვედრა 20:00 სთ-ზე გაიმართება.

16.02.2017. თბილისის ოლიმპიური სასახლე. VIII ტური

12:00 მფკ აფხაზეთი  - მფკ თბილისი ვარიორსი

14:00 მფკ თბილისი - მფკ ტატიშვილი   

16:00 მფკ სტუ-თელასი - მფკ იბსუ

18:00 მფკ ბსუ (ბთ) - მფკ დინამო (ბთ)

20:00 მფკ აგორა - მფკ მგლები  

ჩემპიონატის პარტნიორები და მხარდამჭერები არიან: სილკ უნივერსალი, სპორტული ბრენდი „SALLER”, “წყალი მარგებელი“, იურიდიული ჯგუფი „ერისთავი და პარტნიორები“, „ტატიშვილის სამედიცინო და სპორტული რეაბილიტაციის ცენტრი“

მედია პარტნიორები: რადიოები, “თანამგზავრი 92,3“, „იმედი“, JAKO FM, „კომერსანტი“, ვებ პორტალები, sportall.ge, worldsport.ge, sportstar.ge, adjarasport.com, mysports.ge, geosports.ge,  გაზეთი „ლელო” და სპორტული ჟურნალი „ათიანი“.

სპორტული სააგენტო SBM-ის პრესსამსახური / sbm.ge